భగవాన్‌ వేదవ్యాసమహర్షి రచించిన పురాణాలలో ఎంతో విశేషమైనది దేవీ భాగవతం. ధర్మార్ధకామ మోక్షదాయకాలైన ఎన్నో కథలు, వృత్తాంతాలు ఈ పురాణంలో ఉన్నాయి. జగన్మాత దివ్యవైభవాన్ని, ఆమె సర్వవ్యాపకత్వాన్ని ఈ పురాణం తెలియచేస్తుంది. పన్నెండు స్కంధాలతో రచించబడ్డ ఈ పురాణమే అష్టాదశ మహాపురాణాలలో ఒకటని కొందరి అభిప్రాయం. అయితే శ్రీహరి దివ్యవైభవాన్ని వర్ణించే భాగవతమహాపురాణం ఎంత విశిష్టంగా అష్టాదశ పురాణాలలో గుర్తింపు పొందిందో, అదేవిధంగా దేవి దివ్య తత్త్వాన్ని ప్రబోధించే దేవీ భాగవతం కూడా స్వతంత్ర పురాణంగా అంతే ప్రాముఖ్యాన్ని పొందింది.
